Ricardo Barcia formalizara unha hipoteca de 90.000 euros para comprar un piso de unha habitación en Salceda de Caselas (Pontevedra). No ano 2008, este camioneiro quedou no paro e afogado pola súa precaria situación, tivo que deixar de pagar a hipoteca en xullo pasado tras esgotar as prestacións por desemprego e logo de recorrer a créditos doutras entidades financeiras e ás axudas de familiares para tentar solucionar a súa situación. Até ese momento amortizara case 40.000 euros.

Afogado pola precariedade e polas presións da entidade financeira, este luns, 19 de novembro, Barcia decidiu, como moitos afectados polas hipotecas por todo o Estado, acampar fronte a sede da entidade e iniciar unha folga de fame, apoiado en todo momento por membros da plataforma Stop Desahucios.

Tras varios tiras e afrouxas co director da sucursal, e ante a presenza de numeros reporteiros de varios medios que acudiron ao lugar, finalmente Ibercaja decidiu ofrecer a Barcia a solución que están agardando todos os afectados polas hipotecas no Estado: a dación en pago. Un acordo plasmado nun documento que asinaron dous apoderados da entidade perante un notario.